Namangan shahrida 2010-2011 o’quv yilida umumta’lim maktablari uchun mo’ljallangan darsliklar va o’quv-uslubiy qo’llanmalarning ko’rgazma-yarmarkasi bo’lib o’tdi.
Joriy yilda mamlakatimiz bo’ylab o’tkazib kelinayotgan bunday yarmarkalar matbaachilik sohasida erishilayotgan yutuqlarni keng targ’ib etish, yoshlarning kitobga qiziqish va ishtiyoqini oshirish, chop etilayotgan darsliklar haqida o’qituvchilar va o’quvchilarning fikrini o’rganishda muhim ahamiyat kasb etayotir.
Ko’rgazmada Cho’lpon, G’afur G’ulom nomidagi nashriyot-matbaa ijodiy uylari, “Sharq” nashriyot-matbaa aksiyadorlik kompaniyasi va boshqa bir qator nashriyotlarda chop etilgan darslik va qo’llanmalar, badiiy va ilmiy adabiyotlar, turli matbaa mahsulotlari namoyish etildi.
Kitob bayramiga aylanib ketgan ushbu ko’rgazmada viloyatning barcha shahar va tumanlaridagi ta’lim muassasalari xodimlari, o’qituvchi va o’quvchilar, adabiyot ixlosmandlari qatnashdi. So’zga chiqqanlar mamlakatimizda ma’naviy-ma’rifiy ishlar samaradorligini oshirish, yoshlarimizni har jihatdan barkamol etib tarbiyalash borasida amalga oshirilayotgan ishlar, chop etilayotgan darsliklarning sifati, yutuq va kamchiliklari xususida fikr-mulohaza bildirdi.
O'zA, A.Sattorov, 15.12.2009 16:10
http://uza.uz/uz/culture/10606/
